تاند (پنجشنبه، د جوزا ۱۰ مه) د طالبانو کورنیو چارو وزارت کابل ته د پاکستان د کورنیو چارو وزارت د مرستیال محمد خُرم آغا په مشرۍ د دغه هېواد د یوه پلاوي د سفر خبر ورکړی.
سرچینې په یوه اعلامیه کې ویلي، چې پاکستاني پلاوي د طالبانو د کورنیو چارو وزارت لومړي مرستیال محمد نبي عمري سره لیدلي او پر یو شمېر امنیتي مسایلو ورسره غږیدلی.
د اعلامیې له مخې، خرم اغا د ډېورند کرښې پورې غاړه د «بِشام» سیمې د روان میلادي کال د مارچ ۲۶ ترهګریز برید په اړه خبرې وکړې او په امنیتي برخه کې یې د طالبانو د رژیم د مرستې هیله وکړه.
سرچینه زیاتوي چې عمري په دې اړه وویل: افغانستان هسې چې ځان لپاره امن غواړي، نورو ته هم ښې هیلې لري. نوموړي زیاته کړه: موږ د «شر» په سیاست باور نه لرو. نیت او عمل مو داسې دی چې په سیمه کې امن د ځان او ټولو په خیر بولو. د «بشام ترهګریزه پېښه» یوه بده حادثه وه.
دغه طالب مقام زیاته کړې:ټول باید د خپلو ساحو امنیتي مسوولیت پر غاړه ولرو او د مسایلو د انحراف پر ځای واقعي همکاریو ته زمینه مساعده کړو. اسلامي امارت دې ته ژمن دی چې له خپلې خاورې نورو ته د ناوړه استفادې اجازه ورنه کړي؛ له نورو هم ورته هیله لري.
د پاکستاني پلاوي د نورو لیدنو کتنو په تړاو تر اوسه څه نه دي ویل شوي.
دا له څه موده ځنډ وروسته افغانستان ته د یوه لوړپوړي امنیتي پاکستاني پلاوي سفر دی، چې طالب رژیم سره یې له پرله پسې ناندریو ترسره کوي.