تاند (چهارشنبه، د جوزا ۹مه) په لغمان کې د يوه کور د دېوال د نړېدو له امله د يوې ښځې او يوه ماشوم په ګډون د يوې کورنۍ اووه تنه مړه او ټپيان شول.
د طالبانو تر کنټرول لاندې باختر دولتي خبري آژانس خبر ورکوي چې دغه پيښه د لغمان ولايت مرکز ته څيرمه د يونس چوک په سیمه کې شوې چې له امله يې د دې کورنۍ درې تنه غړي وژل شوي او څلور نور ټپيان شوي دي.
ټپيان روغتون ته ليږدول شوي او روغتيايي حالت يې د اندېښنې وړ بلل شوى دى.
ځايي اوسېدونکي وايي، چې د دې کورنۍ غړي له د ګرمۍ له کبله له کوټې بهر ويده وو، چې دېوال راپرېوت.
که څه هم د دې پېښې کره لامل معلوم نه دی، خو په بېلابېلو سیمو کې وروستیو اورښتونو دېوالونه کمزوري او زیانمن کړي دي.