تاند (یکشنبه، د جوزا ۶ مه) ملګرو ملتونو په خپل تازه راپور کې د نجونو پر زده کړو د بندیزونو ویجاړونکې پایلې څېړلې او څرګنده کړې یې ده، چې دې بندیزونو او نورو محدودیتونو په افغانستان کې د ښځو او نجونو د ژوند ټول اړخونه اغېزمن کړي دي.
دغه راپور چې د سې شنبې په ورځ د می په ۲۵مه د ملګرو ملتونو د ښځو په وېبپاڼه کې خپور شو، ښيي چې د ښځو او نجونو پر ازادۍ د محدودیتونو له لګولو او په ځانګړې ډول د نجونو پر زده کړو د بندیز له لګولو وروسته،اجباري ودونه ۲۵ سلنه زیات شوي دي.
د کم عمره نجونو په منځ کې د زیږون کچه ۴۵ سلنه لوړه شوې او د افغان نجونو او ښځو په منځ کې د میندو د مړینې خطر لږ تر لږه ۵۰ سلنه زیات شوی دی.
د یادونې وړ ده چې دغه راپور له ۲۰۲۲ څخه تر ۲۰۲۴ کلونو پورې له ۷۰۰ ښځو سره د مشورو او بحثونو پر بنسټ جوړ شوی او د مهاجرت نړیوال سازمان او په افغانستان کې د ملګرو ملتونو د مرستندوی پلاوي (یوناما) په ګډون په افغانستان کې د ملګرو ملتونو د نورو فعالو ادارو په همکارۍ چمتو شوی دی.
په همدې حال کې، د ملګرو ملتونو د چارواکو په وینا، په افغانستان کې ۱.۴ میلیونه ښځې او نجونې د زده کړو له دوام څخه بې برخې دي او هغه پالیسي چې د دې محرومیت لامل شوې، نه جبرانېدونکي پایلې لري.
په افغانستان کې د ښځو پر حقونو محدودیتونه د هغوی د ژوند ټولې برخې رانغاړي.
The restrictions on women’s rights in #Afghanistan reverberate across all sectors & facets of life.
Our data projections link the ban on girls’ education with increases in child marriage by 25%, early childbearing by 45%, maternal mortality by 50%.
More: https://t.co/yI1f678nCs— UN Women Afghanistan (@unwomenafghan) May 25, 2024