تاند (چهارشنبه، د جوزا دوهمه) ملګري ملتونه وايي چې د دوحې درېیمه غونډه به د افغانستان لپاره د هېوادونو د ځانګړو استازو په ګډون د جون په ۳۰مه او د جولای په لومړۍ (د سرطان په ۱۰ او ۱۱) جوړه شي.
ملګرو ملتونو ویلي چې د دې غونډې هدف “له افغانستان سره په منظم او سیستماتیک ډول د نړیوال تعامل زیاتول دي.”
ملګرو ملتونو د سې شنبې په ورځ (د جوزا لومړۍ نېټه) د طالبانو له جګپوړو چارواکو سره د ملګرو ملتو د سرمنشي د مرستیالې روزمیري ديکارلو د لیدنې په اړه جزئیات وړاندې کړل.
ديکارلو د مې میاشتې له ۱۸ نیټې څخه تر ۲۱ نیټې پورې په کابل کې د افغانستان د پخواني ولسمشر حامد کرزي ترڅنګ له طالب چارواکو او ځینو افغان شخصیتونو سره وکتل.
هغې د دغه سفر په ترڅ کې د طالبانو د بهرنیو چارو وزیر امیر خان متقي ته بلنه ورکړه چې د دوحې په دریمه ناسته کې ګډون وکړي.
ملګرو ملتونو ویلي چې په دې غونډه کې به د افغانستان د مدني ټولنې استازي هم ګډون وکړي. د دوحې په پخوانۍ غونډه کې د مدني ټولنې د غړو ګډون یو له هغو دلایلو څخه و چې طالبانو په دې غونډه کې له ګډونه انکار وکړ.
د طالبانو د ريیس الوزرا د دفتر سیاسي مرستیال د دوحې په دریمه غونډه کې په مشروط ډول ګډون ته تیاري ښوولې ده.
مولوي عبدالکبیر روانه اونۍ اغلې ډیکارلو ته وویل چې افغانستان د طالبانو په بشپړ کنټرول کې دی او دا هېواد “یو امیر لري او د هغه اطاعت کیږي.”
د ملګرو ملتونو په خبرپاڼه کې راغلي چې افغان شخصیتونو د سرمنشي ګوتریش مرستیالې ته ویلي چې “له افغانستان سره د نړیوالې ښکیلتیا لپاره هر ډول ستراتیژي باید هغه بشري، پرمختیايي او اقتصادي ننګونې حل کړي چې افغانستان ورسره مخامخ دی.”
بیان زیاتوي، «دوی د مخدره موادو او تروریستي ډلو د خطرونو او ګواښونو یادونه هم وکړه،» د سرمنشي مرستیالې په کابل کې له طالبانو او افغان شخصیتونو سره په کتنو کې په افغانستان کې د بشري حقونو پر وضعیت په ځانګړې توګه د ښځو پر زده کړو د محدودیتونو په اړه خبرې وکړې.