تاند (چهارشنبه، د جوزا ۲ مه) د طالبانو د بهرنیو چارو وزارت وايي چې د ازبکستان حکومت په افغانستان کې له سیلاب ځپلو سره مرستې کوي او زیاته کړې یې ده چې د دغه هیواد ۲۰۰ ټنه خوراکي او غیر خوراکي توکي بلخ ته رسېدلي دي.
دغه وزارت په خپله ایکسپاڼه کې ویلي چې په دې مرستو کې اوړه، وريجې، غوړي، غنم، غوښه، د اوبو ټانکونه، خېمې او يو شمېر نور توکي شامل دي.
د افغانستان په چارو کې د ازبکستان ځانګړی استازی عصمت الله ایرګاشیف بلخ ته راغلی او له چارواکو یې غوښتي چې د دغه هېواد له وروستیو سېل ځپلو سره مرستې وکړي.
ښاغلی ارګاشیف زیاته کړه چې دا په تېرو دوو کلونو کې افغانستان ته د ازبکستان لسمه مرسته ده.
د رسمي راپورونو له مخې، د وروستیو سیلونو له امله یوازې په بغلان کې تر ۳۱۵ ډېر کسان وژل شوي او شاوخوا ۴۰ زره ماشومان بې کوره شوي دي.
د يادونې وړ ده چې په تېرو لسو ورځو کې په هېواد کې تر ټولو ويجاړوونکي سېلونه راغلي، چې له امله يې د خلکو د مرګ ژوبلې په اړه پراخې اندېښنې رامنځته شوې دي.
په تېرو لسو ورځو کې د بدخشان، تخار، بادغیس، فاریاب، بغلان، فراه او غور ولایتونه د ویجاړونکو سېلونو شاهدان وو، چې په پایله کې یې سلګونه کسان مړه او زرګونه کورونه ویجاړ شول.