تاند ( ۴ شنبه، د ثور ۲۶مه) د ملګرو ملتونو د سرمنشي ویاند فرهان حق ویلي، چې د سولې په چارو کې د دغه نړیوال سازمان د سرمنشي مرستیال ژان پیر لاکروکس به نن کابل ته په یوه سفر لاړ شي.
هغه د دې سفر موخه د ناچاوده توکیو د خطرونو او زیانونو په تړاو د نوموړي وینا ښودلې.
څرګنده نه ده، چې د سرمنشي مرستیال به طالب چارواکو سره هم ویني او کنه او که هو پر کومو موضوعاتو به غږیږي.
په دې ورځو کې د افغانستان په اړه د ملګرو ملتونو لویه بوختیا، نړیوالې ټولنې سره د دغه هېواد د تعامل د لار پرانیستو په تړاو د دوحې د درېیمې ناستې پر برابرولو تمرکز دی.
تر اوسه د جاپان سفیر خپله په دې اړه د طالبانو یو شمېر چارواکو سره لیدلي، چې دې ناستې ته د پلاوي استولو لپاره یې وهڅوي او د یوناما مشره ایران ته تلې چې د ایراني چارواکو په وسیله په دې اړه طالب چارواکي فشار لاندې راولي او راضي یې کړي.
د تاند وېب پاڼې د باوري سرچینو د معلوماتو له مخې، په پام کې ده چې دا ناسته د راتلونکې جون میاشتې په دېرشمه او د جولای په لومړۍ نېټه ترسره شي.
سرچینې زیاتوي، چې له ناستې مخکې تمه ده په نږدې وخت کې د ملګرو ملتونو د سرمنشي مرستیال کابل ته د یوه پلاوي په مشرۍ لاړ او هڅه وکړي چې طالب چارواکي دغې ناستې ته د پلاوي په استولو راضي کړي.
تر اوسه نه ده څرګنده، چې نننی سفر همدغو خبرو سره تړاو لری که د ملګرو ملتونو کوم بل مرستیال یا مرستیاله به طالب چارواکو سره د دوحې ناستې په تړاو د خبرو لپاره کابل ته راځي.
د تاند سرچینې دا هم وایي، چې د ملګرو ملتونو سرمنشي په ډېر ګومان د دوحې د راتلونکې ناستې مشري نه کوي او دا چاره خپل مرستیال ته سپاري.
د دوحې د راتلونکې ناستې په اړه تاند ته د باوري سرچینو معلومات – تاند (taand.net)