تاند (دوشنبه، د ثور ۱۰ مه) د کانونو وزارت وايي چې د مس عینک او نورو کانونو د استخراج لپاره یې بهرنیو شرکتونو ته شرط ایښی چې د کانونو د پروسیس چارې به په افغانستان کې دننه ترسره کوي.
د کانونو او پیترولیم وزارت له خبر سره سم، چې پرون یې پر خپله ایکسپاڼه کې خپور کړ، شهاب الدین دلاور په کابل کې د چین د ایم سي سي شرکت له مشر سره له کتنې وروسته وویل، طالبان به هغه وخت له ایم سي سي شرکت سره د مس عینک د استخراج په برخه کې موافقه وکړي چې دا شرکت په افغانستان کې دننه د کانونو د پروسس په برخه کې لا زیاته پانګونه وکړي.
دغه چینایي شرکت یو له سترو شرکتونو څخه دی چې د مسو، سربو او جست د استخراج او پروسس په برخه کې فعالیت کوي.
د کانونو او پټرولیم وزارت د معلوماتو له مخې، دغه شرکت لېواله دی چې د افغانستان په لویو کانونو په تیره بیا د مسو، سربو او جستو په کانونو کې پانګونه وکړي.
ایم سي سي د جمهوري حکومت په لومړیو کلونو کې د مس عینک د استخراج موافقه وکړه خو وروسته یې خپل شرایط بدل کړل او تر دې چې بالاخره له ټولو شرایطو په شا شو.
د چینايي پانګوالو په اړه ویل کېږي چې د دوی پانګونه ډېر ځلي په دې خاطر نورو هیوادونو ته ګټه نه رسوي چې ځايي خلکو ته د کار زمینه نه برابروي ځکه چې له خپلو ګارګرو کار اخلي او له بلې خوا هڅه کوي چې خام مواد خپل هیواد ته انتقال او هلته یې پروسیس کړي.