تاند (یکشنبه، د ثور ۹ مه) په داسي حال کې چې له پېښو سره د مبارزې په چارو کې د دولت وزارت د تېرو څلور ورځو د ورښتونو او سیلونو له امله د ۸ تنو د مړینې خبر ورکوي، د هواپېژندنې اداره سبا (دوشنبې) د افغانستان په ۱۷ ولایتونو کې د نورو شدیدو ورښتونو وړاندوینه کوي.
بدخشان، تخار، بلخ، سمنګان، پروان، کابل، پکتیا، کونړ، لغمان، پنجشېر، کاپیسا، خوست، ننګرهار، بامیان، میدان وردک، نورستان او لوګر هغه ولایتونه دي چې د ترانسپورت او هوايي چلن وزارت د هوا پېژندنې ادارې پکې د ورښتونو وړاندوینه کړې ده.
له بلې خوا له پېښو سره د مبارزې په چارو کې د طالبانو د دولت وزارت نن رسنیو ته په استولې خبرپاڼه کې ویلي چې د روان ثور له شپږمې را په دې خوا په تېرو ۴ ورخو کې د سیلونو او ورښتونو له کبله په ۱۵ ولایتونو کې د سر ومال تاوانونه پېښ شوي دي.
د دغه وزارت پر اساس، ۸ تنه مړه شوي، او درې ټپیان دي. همداراز ۱۴۰ کورونه نړېدلي او لسګونه جریبه کرنیزه مځکه، چې فصلونه پرې ولاړ وو، ویجاړه شوې ده.
له پېښو سره د مبارزې د وزارت ویندوی ملا جانان سایق ویلي دا زیانونه په کندهار، نورستان، بادغیس، غور، ننګرهار، میدان وردګ، هرات، سمنګان، پنجشېر، لغمان، کونړ، بغلان، کندوز، سرپل او پروان ولایتونو کې اوښتي دي.
د مخکینیو سیلونو په شان په تېرو ۴ ورځو کې هم لږترلږه ۲۰ کیلومتره سړک وران شوی او ۳۰ څاروي تلف شوي دي.
د سایق په وینا، د وري له ۲۲مې نیټې څخه د غويي تر لومړۍ نېټې، د اورښتونو او سیلابونو له امله د مړو شمیر ۹۹ او د ټپيانو شمېر ۶۳ تنه ښودلی و.