تاند (یکشنبه، د ثور ۹ مه) د کډوالو او راستنېدونکو چارو وزارت لپاره د طالبانو چارواکو پرون له پاکستان څخه په جبري توګه هېواد ته د ۸۰۰ افغانانو د راستنېدو خبر ورکړی دی.
یاد شوي وزارت د یوې خبرپاڼې په خپرولو سره ویلي چې پرون د تورخم بندر له لارې ۴۷ کورنۍ، چې د غړو شمېر يې ۲۶۸ تنه کېږي او د کندهار ولایت د سپین بولدک له لارې ۱۰۰کورنۍ، چې د غړو شمېر یې ۵۲۳ تنه کېږي په جبري توګه خپل هېواد ته راستانه کړای شوي دي.
د سرچینې د مالوماتو له مخې ۲۳ تنه نور چې تازه د پاکستان له زندانونو څخه ازاد شوي وو هم د سپین بولدک له لارې هېواد ته را ستانه شوي دي.
د کډوالو او راستنېدونکو چارو وزارت همدارنګه ویلي، چې راستانه شوي کسان تر نوملیکنې وروسته د نورو مرستو په موخه د ملګرو ملتوو عالي کمېشنرۍ او کډوالۍ نړیوال سازمان دفترونو ته وروپېژندل شوې او همدارنګه هرې کورنۍ ته د دوی له لوري لس لس زره افغانۍ مرسته وشوه.