تاند (یکشنبه، د ثور دویمه ) د طالبانو رژیم د سعیدالله نعماني په نوم یو مفتي د نورستان د عامې روغتیا ریاست د نوي رئیس په توګه ګومارلی دی.

د طالبانو تر واک لاندې باختر خبري اژانس لیکلي، چې په دې اړه د مراسمو پر مهال ولایتي چارواکو د یاد ریاست له کارکوونکو وغوښتل، چې نوي رئیس سره همکاري وکړي.

د سرچینې د معلوماتو له مخې، په دې مراسمو کې مفتي سعیدالله نعماني ډاډ ورکړ، چې د یاد ریاست اړوند چارې به په منظم او ‏په بشپړه ایماندارۍ او ریښتیني ډول ترسره کوي؛ تر څو د یاد ولایت د ناروغانو روغتیايي ستونزو ته پر وخت رسېدنه ترسره او غوره او معیاري درملنه یې وشي.

د طالبانو لخوا د عامې روغتیا رئیس په توګه د یوه مفتي ګومارنه لومړی ځل نه دی.

تر دې مخکې هم پر ګڼو مسلکي ادارو طالب رژیم ورته چارواکي ګومارلي، چې توندو نیوکو سره مخ شوي او طالبان د واک په کامل انحصار تورن شوي؛ خو دوی دا ادعاوې رد کړې دي.