تاند (یکشنبه، د ثور ۲ مه) د افغانستان د هواپېژندنې ادارې نن یکشنبه هم د افغانستان په ۱۹ ولایتونو کې د واورې، سخت باران، تالندې- برېښنا او سېلونو وړاندوینه کړې ده.
دې ادارې پرون په یوه خبرتیا کې وویل، د سالنګونو په ګډون په بدخشان، کابل، میدان وردګ، ننګرهار، لغمان، کاپیسا، پروان، پنجشېر، بغلان، تخار، بامیان، دایکنډي، اروزګان، زابل، غزني، پکتیکا، خوست، پکتیا او لوګر کې به د باران اندازه له ۱۵ تر ۳۰ میلي مټرو او د واورې اندازه له ۱۵ تر ۳۰ سانتي مټرو پورې وي.
له طبیعي پېښو سره د مبارزې په چارو کې د دولت وزارت پرون ویلي و، له چهارشنبې راپه دې خوا په افغانستان کې د ورښتونو او سېلونو له امله نهه ویشت تنه مړه شوي او ۷ تنه ټپيان شوي دي.
سږني ورښتونه په افغانستان او ټوله سیمه کې بې ساري بلل شوي او د چاپېریال ساتنې متخصصان یې علت اقلیمي بدلون بولي. دوی وايي د اقلمیي بدلون یوه نښه دا ده چې د ورښتونو وخت دبلیږي او هغه ورښت چې باید په څو میاشتو کې واوري ممکن په څو اوونیو کې واوري.
د تېر ژمي په لومړیو دوو میاشتو کې ورښتونه ونه شول او ډطره اندېښنه یې رامنځته کړه چې ممکن سږ کال افغانستان له خورا سختې وچکالۍ سره مخامخ شي.