تاند (۴شنبه، د حمل ۱۵ مه) له ټایوان څخه د نن سهار د زورورې زلزلې له امله په لومړنیو راپورونو کې لږ ترلږه د ۴ تنو د وژل کېدو او څه باندې ۷ سوو کسانو د ټپي کېدو خبر ورکړل شوی.
. د رویټرز د راپور له مخې، دا زلزله د ریشتر په کچه ۷.۲ درجې د ټایوان په ختیځ کې شوې او مرکز یې د هوآلین ښار وو.
په ورته وخت کې چې دا زلزله وشوه، د جاپان په سویل او فیلیپین کې د سونامي خبرداری هم ورکړل شوی.
ویل کیږي چې دا په دې هیواد کې په تیرو ۲۵ کلونو کې تر ټولو قوي زلزله وه.
د اسوشیتیدپریس خبري اژانس د راپور له مخې، د ټایوان په هوالین سیمه کې یوه پنځه پوړیزه ودانۍ ویجاړه شوې او په پلازمېنه تایپي کې د زړو او ځینو نویو ودانیو تیږې جلا شوې دي.
په ټول ټایوان کې د اورګاډي شبکې او په تایپي کې ترځمکې لاندې مترو کار پریښی دی.
ویره ده چې د دې سختې زلزلې، چې له کبله یې څونامي هم راغلې، د مرګ ژوبلو شمېر تر دې ډېر وي.