د افغانستان د هواپېژندنې دولتي ادارې له نن (چهارشنبې) څخه د دې اونۍ ترپایه د هېواد د مرکز او شمال د سیندیزو حوزو په یوشمېر سیمو کې د نسبتا تېزو بارانونو او سلونو اټکل کړی دی.
د طالبانو د انرژۍ او اوبو وزارت پرون اعلان وکړ چې د روان حمل د ۱۵ او ۱۷ مې نېټې ترمنځ د غزني، پکتیا، پکتیکا، لوګر، ننګرهار، میدان وردګو، غوربند، پنجشیر، لغمان، کونړ، تخار، بلخ، سمنګان، سرپل، میمنې، بامیان، بغلان او کوکچې د سیندونو پر لاره او د یادو سیمو په ځینو سیلبُرونو کې د د واورو د ویلې کېدو، بارانونو او د اوبو د کچې د لوړېدو له کبله د سېلابونو د راوتلو احتمال شته.
دې وزارت له خلکو غوښتي دي چې د سېلونو د جاري کېدو په صورت کې د کوزنیو سیمو هغه خلک چې سیندونو ته نژدې ژوند کوي خبر کړي.
په وروستیو کې د افغانستان په ننګرهار، فاریاب او سرپل ولایتونو کې د سیلونو له کبله لږترلږه ۷ تنه مړه او زرګونه هکتاره کرنیزه مځکه ویجاړه شوه.