تاند (۵ شنبه،د حوت ۱۷ مه) په افغانستان کې روان بشري ناورین ته د نړیوالو د لږې پاملرنې له ادعاوو سره سره، د دغه هېواد لپاره د ملګرو ملتونو د سرمنشي ځانګړې استازې او په کابل کې د یوناما دفتر مشرې روزا اوتونبایوا ویلي چې په تېرو دوه نیمو کلونو کې بسپنه ورکوونکو افغانستان ته نژدې اته ملیارډ ډالره مرستې چمتو کړې دي.
نوموړې پرون ناوخته د ملګرو ملتونو د امنیت شورا غونډې ته وویل چې د دغې بسپنې په وسیله، په افغانستان کې شاوخوا ۳۲ ملیون اړ کسان له بشري مرستو برخمن شوي دي.
د سرچینې د معلوماتو له مخې، پر دغو بسپنو افغان ناورین ځپلو ته د کافي خوړو، اوبو، مناسبې سرپناه او عوایدو په برخه کې مرستې شوې دي.
په افغانستان کې د یوناما دفتر مشرې یوځل بیا له نړیوالو وغوښتل چې له افغانستان سره خپلو مرستو ته دوام ورکړي او د دې هېواد خلک یوازې پرې نه ږدي.
د خوړو د نړیوال پروګرام په وینا، د افغانستان د شاوخوا ۴۲ ملیونه نفوس یو پر درېیمه برخه یې د خوراکي موادو له جدي کمښت سره مخ دي او نه پوهېږي چې د بل وخت خواړه به له کومه کوي.
د دې مرستو په اړه په کابل کې د طالبانو واکمن رژیم څه نه دي ویلي، خو مخکې یې نیوکې پرې کړي چې دا مرستې باید د انکشافي برخو لباره وشي او د خلکو لپاره حیاتي کارونه پرې ترسره شي.
بس دا ډوډۍ دې کفار راکوي نور نو اسلامي نظام کې هر څه شته.