تاند( شنبه، د حوت ۱۲ مه) د طالبانو د بهرنیو چارو وزارت د سیاسي مرستیال عباس ستانکزي له هغه خبرداري وروسته، چې ډیورنډ کرښه به پاکستان د بنګله دېش د بیلتون په شان بیا ټوټې کوي؛ یوه څېړنیز بنسټ په تازه څېړنه کې وړاندوېنه کړې چې د پاکستان د طالبانو تحریک ټي ټي پي به د پاکستان تر ولکې لاندې پښتونخوا کې د افغانستان د طالبانو په تقلید یو « کوچنی امارت» جوړ کړي.
د منځني خاور د رسنيو څېړنیز انستیتوت (MEMRI) په دغه نوې څېړنه کې د کشمیر مسئلې ته په اشارې ویلي چې که د پاکستاني طالبانو تحریک (ټي ټي پي) دا تګلاره بریالۍ شي، د افغانستان او پاکستان تر منځ به ډېره بده پایله ولري.
په دې څېړنه کې راغلي چې د افغانستان د وروستیو پرمختګونو او د طالبانو د« جهادي او ایډیالوژیکو وروڼو» (د افغانستان طالبانو) له خوا د آمریکا پوځي ماتې د دغې ډلې د جوړولو لپاره د یوې مفکورې په رامنځته کولو کې مرسته کړې ده.
ټي ټي پي ډلې او دغه راز پر افغانستان واکمنو طالبانو د دغې وړاندوېنې په تړاو څه نه دي ویلي.
مخکې ټي ټي پي په ضمني ډول له پاکستاني چارواکو سره د خبرو اترو د شرطونو په ډله کې د پښتونخوا په قبایلي سیمو کې دوی ته د دوی په باور، د « اسلامي شریعت» د حاکمولو لپاره د سیمو د تخلیې موضوع هم شامله کړې وه، چې پاکستاني چارواکو رد کړې وه.
پاکستان مدعي دی، چې ټي ټي پي د طالبانو تر واک لاندې افغانستان کې پټنځایونه لري او له هغه ځایه د دوی خلاف بریدونه سمبالوي، خو طالبانو او ډېرو افغان څارونکو دا خبرې بې اساسه ګڼلي او ویلي، چې پاکستان په بې ځایه ادعاوو تل افغانستان د ترهګرۍ د مرکز ښودلو هڅې کړې دي.