تاند( شنبه، د حوت ۱۲ مه) په افغانستان کې د وروستیو ورښتونو له دوام سره، د انساني او حیواني تلفاتو د ورځ تر بلې زیاتوالي خبرونه ورکړل شوي.
یو شمېر رسنیو خبر ورکړی، چې د روانې کب میاشتې له ۹مې تر ۱۱مې، د سختو ورښتونو له امله ۱۵ تنه مړه او نږدې ۳۰ تنه ژوبل شوي دي.
د دې تر څنګ ویل کیږي، چې په وروستیو څو ورځو کې د واورې ورښت له امله نږدې لس زره څاروي هم تلف شوي دي.
د طبیعي پېښو پر وړاندې د طالبانو د رژیم اړوند وزارت په دقیق ډول د دغو تلفاتو او زیانونو په اړه ارقام نه دي وړاندې کړي.
په دغه وزارت کې د تاند یوه سرچینه وایي، چې انساني او حیواني تلفات تر ډېره په لیرې پرتو سیمو کې رامنځته شوي او هلته د مخابراتي شبکو د خرابوالي له امله دقیقو معلوماتو ته لاسرسی ستونزمن شوی.
بل لورته: له سالنګ څخه راپورونه ښيي، چې نن په درېیمه ورځ هم دغه لاره د ترافیکو پر مخ تړلې ده.
د طالبانو تر واک لاندې رسنیو ویلي، چې د طالبانو رییس الوزرا ملا حسن اخوند په ټولو هغو سیمو کې مالدارانو ته د واښو د مرستې امر کړی، چې د ورښتونو له امله یې څاروي د واښو له کمښت سره مخ شوي دي.