تاند (پنجشنبه، د حوت ۱۰ مه) په داسې حال کې چې په افغانستان کې د طالبانو واکمن رژیم د قصاص په نوم د تورنو کسانو د علني اعدام او نورو مجازاتو لړۍ چټکه کړې؛ په دې اړه اندېښنې او مخالفتونه په زیاتیدو دي.
تازه، د ملګروملتونو د بشري حقونو عالي کمېشنرۍ په عام محضرکې د اعدامونو د دغې لړۍ سمدستي درولو غوښتنه کړې ده.
د دې کمېشنرۍ ویاند جرمي لاورینس وویل چې تېره اونۍ په افغانستان کې په عام محضرکې د درې تنو اعدامیدو دوی وېرولي دي.
هغه زیاته کړې، په عام محضرکې اعدامونه چې طالبان یې قصاص بولي، د بشري حقونو له اصولو سره په ټکر کې دي او سمدستي دې ودرول شي.
طالبانو پر افغانستان له واکمنیدو راهیسې پنځه تنه د خپل عدلي سیسټم د پرېکړو او د خپل مشرملاهبت الله اخوندزاده له تایید وروسته په عام محضرکې اعدام کړي دي.
طالب چارواکي په دې اړه د خپلو کړنو پر دوام له ټینګار سره ادعا کوي، چې دا د شرعي احکامو تطبیق او د عدالت راوستو لپاره ګټور دي.
مخکې د طالبانو ویاند ذبیح الله مجاهد په دې اړه له نیوکه کوونکو غوښتي وو، چې هم د شریعت پر احکامو ځانونه خبر او هم د ده په وینا، د افغانستان د مذهبي اصولو په درناوي دې په دې اړه له څرګندونو ډډه وکړي.