تاند (شنبه، د دلوې ۲۸مه) راپورونه وایي، چې پاناما ته څېرمه د یو شمېر افغانانو په ګډون د ناقانونه کډوالو بېړۍ په سمندر کې ډوبه شوې ده.
د پاناما د عامه خوندیتوب وزارت ویلي، په یاده کښتۍ ۲۷ تنه غیر قانوني کډوال وو، چې ډېری یې افغانان وو.
سرچینې په مشخص ډول د مړو شویو کسانو د هویت په اړه څه نه دي ویلي او نه ده معلومه چې افغانان په مړو شویو کې شامل دي کنه؟
ویل شوي، چې په مړو شویو کسانو کې دوه ښځې، یو ماشوم او یو نارینه شامل دی.
د یادونې ده چې امریکا ته ډېر غیر قانوني کډوال د کولمبیا او پاناما ترمنځ په سختو خطرناکو لارو ځي.
تر دې وړاندې هم لسګونه غیر قانوني افغان کډوالو نورو هېوادونو ته پر لارو خپل ژوند له لاسه ورکړی.
د طالبانو له بیا واکمنیدو سره، له افغانستانه په بېلابېلو لارو د کډوالۍ پراخه څپه پیل شوې او وخت په وخت په دې لړ کې د ناقانونه کډوالۍ د ځاني زیانونونو خبرونه ورکړل شوي.