تاند (چارشنبه د دلوې ۴ مه) د افغانستان بانک لپاره د طالبانو د رژیم چارواکو ویلي چې د مختلف سريال لرونکي يا دوه نمره يي بانکنوټونه په دې شرط چې دواړه طرفونه يې اصلي وي او دوه سره نه وي؛ په مندرس بانکنوټونو کې شامل دي.
د دغه بانک په یوه اعلامیه کې راغلي: هغه هېوادوال چې دا ډول بانکنوټونه ولري؛ کولای شي چې د افغانستان بانک او يا هم د سوداګریزو بانکونو تر ټولو نږدې نمايندګۍ ته په ورتګ سره یې پر چلښت وړ بانکنوټو بــدل کړي.
دا په داسې حال کې ده، چې یو شمېر خلک په بازارونو کې د زړو او بې کیفیته شویو افغاني بانکنوټونو له زیاتوالي شکایت لري.
دوی دا هم وایي، چې د طالبانو تر واک لاندې افغانستان بانک دا ډول اعلامیې خپروي، خو دوی چې بانکي نمایندګیو ته له بدلونکو پیسو سره مراجعه کوي، مثبت ځواب نه ترلاسه کوي.