تاند (دوشنبه، د قوس ۲۷ مه) په نیمروز ولایت کې طالب چارواکي وايي چې ایران ۱۹۳ افغان بندیان دوی ته سپارلي دي.
د نیمروز ولایت د اطلاعاتو اوکلتور ریاست نن په یوه خبرپاڼه کې وویل چې دا کسان د قانوني اسنادو د نه لرلوله کبله د ایران په سیستان او بلوچستان ولایت کې نیول شوي وو او د دغه ولایت د مرکز زاهدان په محبس کې بندیان وو.
ایراني چارواکو شاوخوا یو کال وړاندې د طالبانو له حکومت سره د بندیانو د تبادلې په اړه سلا کړې وه او تر دې وړاندې هم ایران یو شمېر افغان بندیان د طالبانو سرحدي چارواکو ته سپارلي وو.
په دې لړ کې په تېرو ۹ میاشتو کې ایران نژدې ۹۰۰ افغان بندیان افغانستان ته سپارلي دي.
زرګونه افغانان په ګاونډیو او د سیمې د هیوادونو په محبسونو کې بندیان دي.