تاند (دوشنبه، د قوس ۲۷ مه) د طالبانو د حکومت ريیس الوزرا د کډوالو د نړیوالې ورځې په مناسبت په یوه پیغام کې ویلي چې باید د کډوالو له لویې او انساني موضوع څخه د فشار د وسیلې په توګه کار وانه خیستل شي.
د ملامحمدحسن اخوند په خپل پیغام کې، چې د طالبانو د حکومت ویندوی ذبیح الله مجاهد پر خپله ایکسپاڼه خپور کړی، له شتمنو او پانګوالو غوښتي چې له ګاونډیو هیوادونو څخه د راایستل شویو کډوالو مرسته وکړي.
ده همداراز ویلي:« اسلامي امارت د خپلو خلکو په ځانګړي توګه د مهاجرینو د ستونزو حل ته متعهد دی او دا خپله دیني او ملي وجیبه بولي.»
سږ کال د کډوالو نړیواله ورځ په داسې حال کې لمانځل کېږي چې پاکستان د بې اسناده کډوالو په نوم د افغان کډوالو نیولو، ځورولو او شړلو ته مخه کړې او په څه کم دوو میاشتوکې یې نژدې ۵ لکه افغان کډوال په داسې حالت کې له خپلې خاورې ایستلي چې د هغوی شتمنۍ یې مصادره کړي، پیسې یې ورڅخه اخیستي دي.
د طالبانو ريیس الوزرا پر افغان کډوالو د ګاونډیو په تېره بیا د پاکستان فشارونوته په اشارې ویلي:« کومو هېوادونو چې کلونه کلونه یې زموږ مهاجرو هېوداوالو ته ځای ورکړی و، موږ ترې مننه کوو. زموږ ولس احسان فراموشه نه دی او د دوی کوربه توب ته د قدر په سترګه ګوري. خو په عین وخت کې زموږ هیله دا ده، چې د مهاجرینو لویې او بشري موضوع ته دې له سیاسي لیدلوري او د آني ګټو او تصمیمونو له زاویې نه کتل کېږي، د فشار په ډول دې نه کارول کېږي، د راستنېدو پروسه دې په ابرومندانه او تدریجي توګه مخته یووړل شي، تر څو خدای مه کړه د بشري فاجعې او په اوږدمهال کې د هېوادونو ترمنځ د کرکې او بدبینۍ باعث ونه ګرځي.»
ملا حسن اخوند د نړۍ له نورو هیوادونو اونړیوالو مرستندویو موسسو هم غوښتي چې د کډوالو موضوع له پامه ونه غورځوي.
د ملګروملتو د کډوالو د لویې کمیشنرۍ پر اساس، څه باندې اته میلیونه او دوه لکه افغانان کډوال دي چې د هغو له منځه څه باندې درې میلیونه په کور دننه او پاتې په نورو هېوادونو کې دي.