تاند (سې شنبه، د عقرب ۳۰ مه) د افغانستان د ازادو رسنیو د ملاتړ بنسټ نی نن د تلویزون د نړیوالې ورځې په مناسبت اعلان وکړ، چې د طالبانو له بیا واکمنیدو سره ۵۲ سلنه افغان تلویزوني شبکې فلج شوي.
سرچینې د دغه وضعیت اصلی دلیل اقتصادي ستونزې ښودلې دي.
له دې سره یو شمېر خبریالان او رسنیز فعالان د بیان ازادۍ وضعیت ناوړه او د اندېښنې وړ ګڼي او وایي طالبانو ځان سانسورولو ته اړ ویستي او د ډېرو مسایلو په اړه اطلاعاتو ته لاسرسی نه لري.
د طالبانو ویاندویان بیا وخت پر وخت د اسلامي شریعت په چوکاټ کې د بیان ازادۍ ته د ژمنتیا خبره کوي.
یو شمېر څارونکي د ځینو تلویزوني شبکو په فلجیدو خوښ دي او وایي بهرنیانو د ناوړه موخو لپاره تمویلول، خو ورسره د خلکو د بیان ازادۍ پر وړاندې رامنځته شوي خنډونه ناسم بولي او د هواري غوښتنه یې لري.