تاند (دوشنبه، د عقرب ۲۲ مه) راپورونه وایي، چې ترکیې په تېرو شلو ورځو کې شاوخوا درې زره افغانان له دغه هېواده ایستلي او کابل ته یې استولي دي.
د طالبانو د کډوالو او بېرته راستنېدو چارو وزارت تایید کړې چې په دې کسانو کې اوه کورنۍ او اوه ماشومان هم شامل دي.
طالبانو د ترکیې د دغې پریکړې په اړه غبرګون نه دی ښودلی.
مخکې د طالبانو د کډوالو وزیر خلیل الرحمان حقاني د ترکیې له سفیر څخه غوښتي وو، چې د افغان کډوالو د په زوره ستنولو پر ځای دوی سره په همغږۍ د هغوی د ستونزو د حل لپاره اقدام وکړي.
په وروستیو کې پاکستان د میلیونونو افغان کډوالو د په زوره ستنولو عملیات پيل کړي.
ورسره ایران هم هره ورځ زرګونه افغانان په زوره باسي، چې ترکیه هم ورسره ملګرې شوې او دا اقدامات د افغانستان د ناورین ځپلي وضعیت لپاره له اندېښنو ډک ګڼل شوي.