تاند (شنبه، د عقرب ۲۰ مه) د پاکستان د پیپلز ګوند مشر او د بهرنیو چارو مخکیني وزیر بلاول بوټو زرداري له دغه هېواده د افغان کډوالو د شړلو په تړاو د واکمن موقت حکومت پر پریکړې او چلند اعتراض وکړ.
نوموړي وویل، چې په دې برخه کې د اوسني حکومت دریځ ګوند او د پوښتنې وړ دی.
هغه زیاتوي، چې باید د کډوالو او ترهګرو ترمنځ توبیر وشی او ورسره کیدونکی چلند متفاوت وي.
د پاکستان موقت حکومت په دې پلمه، چې ګواکې په دغه هېواد کې مېشت افغان کډوال د نا امنیو لامل دي او ورسره ترهګریز بریدونه زیات شوي، د ۱،۷ میلیونو هغو کسانو په ګډون چې پاکستان یې بې اسناده کډوال بولي، د ټولو افغان کډوالو د ویستو پریکړه وکړه.
د دغې پریکړې د عملي کیدو پر روان بهیر سخت اعتراضونه دي او ویل کیږي، چې پاکستاني پولیس افغان کډوال لوټي، شتمنۍ یې ضبطوي او ان د بې عزتۍ تر حده سپک چلند ورسره کوي.
یو شمېر نورو پاکستاني سیاستوالو هم د خپل حکومت دا چلند تر نیوکو لاندې راوستی او پرې د بیا کتنې غوښتنه یې کړې ده.