تاند (پنجشنبه، د عقرب ۱۸ مه) د اقتصادي همکارۍ سازمان (ایکو) د غړیو هیوادونو سرمشریزه نن د افغانستان له ګډونه پرته د ازبکستان په پلازمېنه تاشکند کې جوړه شوه.
د ازبکستان د ولسمشر شوکت میرضیایف د مطبوعاتي دفتر ريیس شېرزاد اسداوف د چهارشنبې په ورځ ویلي و، د ایکو په سرمشریزه کې د افغانستان د ګډون لپاره د دې سازمان د ټولو غړیو هېوادونو موافقه او د نړیوالې ټولنې له لوري د افغانستان د حکومت رسمیت پېژندل په کار دي او له همدې کبله په دې سرمشریزه کې افغانستان ته د ګډون بلنه نه شي ورکولی.
د ازبکستان د ولسمشر مطبوعاتي رييس په دې ټینګار وکړ چې افغانستان د ایکو غړی هېواد دی، خو د ۲۰۲۱ په اګست کې د بدلون له کبله دا هېواد د ایکو په غونډو او فعالیتونو کې په موقتي ډول برخه نه شي اخیستلی.
د طالبانو د واک ته رسېدو څه باندې دوه کاله وځي خو تراوسه هېڅ هېواد د دوی حکومت په رسمیت نه دی پېژندلی.
نړیواله ټولنه وايي، تر څو چې طالبانو د نجونو او ښځو د حقونو په شان د خلکو لومړني حقونه نه وي ورکړي، د دوی حکومت به په رسمیت ونه پېژني.
د اذربایجان، ایران، قرغیزستان، ترکمنستان، ازبکستان، ترکیې او تاجکستان ولسمشرانو او د قزاقستان او پاکستان صدراعظمانو د ایکو په غونډه کې ګډون وکړ.
دوی د سیمې د هیوادونو ترمنځ د اقتصادي همکاریو د پراخیتا پر اړتیا ټینګار وکاوه.