تاند (سې شنبه، د عقرب ۱۶مه) په افغانستان کې د ملګروملتو همکارې مرستندویې موسسې وايي، له پاکستان څخه افغانستان ته د ایستل شویو افغان کډوالو په سلو کې ۶۰ ماشومان دي.
دوی د سې شنبې په ورځ وویل چې هره ورځ سلګونه کورنۍ له پاکستان څخه ایستل کېږي چې فوري مرستو ته اړتیا لري.
د ملګروملتو د بشري مرستو د تنظیم (همږغۍ) ادارې، اوچا په یوه بیان کې ویلي:«افغانستان ته د راستنو شویو افغانانو تر ۶۰ سلنې ډېر ماشومان دي. د دوی حالت ناوړه دی، ډېرو یې په ورځو – ورځو داسې سفر کړی چې نه پوهېدل په لاره به ونیول شي اوکه تر پولې به ورسیږي.»
د ملګروملتو همکارو مرستندویو موسسو له مرستندویانو غوښتي چې له دې ډول خلکو سره مرسته وکړي.
په همدې حال کې اروپايي اتحادیې د سې شنبې په ورځ اعلان وکړ چې له پاکستان څخه د ایستل شویو افغانانو او همداراز د هرات د زلزله خپلو د اړتیاوو د پوره کولو لپاره ۶۱ میلیون یورو مرسته کوي.
دې اتحادیې ویلي چې دا مرسته یې پر هغې ۹۴ میلیون یورويي مرستې سربېره ده چې د سږ کال په پیل کې یې د افغانستان لپاره ځانګړي کړې وه.
د ملګروملتو پر اساس له کله چې پاکستان له خپلې خاورې د بې اسناده افغان کډوالو د وتلو لپاره مهلت اعلان کړی، تراوسه تر ۲ لکه ډېر افغانان افغانستان ته راګرځېدلي او او هره ورځ په زرګونو نور راروان دي.
اکثره راستانه شوي کډوال وايي چې د پاکستان امنیتي ځواکونو پیسې ورڅخه اخیستي او شتمنۍ یې ورمصادره کړي دي.
دغو خلکو سره څه وعده شوی چی دلته یی راوستی. ډیری یی ماته افغانان نښکاری. ټول هغه غریبه او ناخبره خلک دی چی د یوه ناورین لپاره قربانی کیږی ـ