تاند (جمعه، د عقرب ۱۲ مه) د طالبانو دفاع وزیر ملا یعقوب مجاهد د افغان کډوالو په اړه د پاکستان وروستي چلند ته په توند غبرګون کې دغه هېواد ته خبرداری ورکړ، چې د خپلې دغې پریکړې پایلې وسنجوي.
نوموړي په یوه غږیز پيغام کې پاکستان ته ویلي: هومره وکرئ، چې رېبلی شئ، داسې کړنې مو حالت خطرناک لور ته بیایي.
د طالبانو دفاع وزیر دغه راز د پاکستان حکومت ته د « رژیم » اصطلاح کارولې، چې د نه په رسمیت پېژندلو مانا ورکوي.
هغه له یوه لوري د افغان کډوالو د اېستو مخالفت وکړ، خو په عین حال کې یې غوښتنه وکړه چې پاکستان دې دغو کډوالو ته د خپل هېواد د باعزته ستنیدو زمینه برابره کړي.
پاکستان د ملا یعقوب خبرداري ته غبرګون نه دی ښودلی.
پرون د طالبانو د بهرنیو چارو وزارت چارواکو او نن یې د دفاع وزیر ترڅنګ د رژیم رئیس الوزرا پر پاکستان نیوکې وکړې.
د طالبانو منتقدان بیا نیوکه کوي، چې دوی ولې افغان کډوالو ته د پاکستان د خبرداري له پيله دیپلوماتیکې هڅې ونه کړې.
د دوی په باور، پاکستان افغان کډوالو ته ۲۸ ورځې مهلت ورکړی و، چې مهلت یې د تېرې میلادي میاشتې له پای ته رسیدو سره پای ته ورسېد او اوس طالب چارواکي د خبرو غوښتنه کوي.
پاکستان افغان کډوال په دغه هېواد کې د ترهګریزو پېښو په سمبالولو او نورو ناقانونه کړنو تورن کړي، خو طالب چارواکو او کډوالو دا تورونه بې اساسه ګڼلي دي.
پر افغان کډوالو د پاکستان د ظلمونو له دوام سره، سلګونه زره دغه کډوال خپل هېواد ته په ستنیدو مجبور شوي او ګڼو ستونزو سره مخامخ دي.
د طالبانو ټولو مشرانو د نجس تش په نوم ملک پر ضد ښه بیانونه ورکړیدې, دا دناپاکستان پر ضد په ملي روحیه کې دژوري تبدیلي علامات دې, مننه ورڅخه کوو
خپل وطن ته د افغان کډوالو راستنېدل ښه کار دی ، خو دا پروسه باید باعزته او د ملګرو ملتونو د کډوالو د ادارې تر نظر لاندې د افغانستان او پاکستان د هېوادونو د استازو په حضور کې سرته ورسیږي .
اما د پنجابي پوځیانو یو طرفه پرېکړه او هغه هم په داسې وخت کې چې سوړ ژمی راروان دی ، خصوصا د افغانستان اکثرا سیمې چې هلته غذایی او سونګ مواد باید د ژمي له رارسېدو مخکې ذخیره او ځای پرځای شي ، د کډوالو له ژوند سره لوبې کول دي .
د افغانستان د خارجه چارو وزارت ته لازمه ده چې د ملګرو ملتونو او خصوصا د IOM له سازمان سره په دې هکله اړیکې ونیسي تر څو له پاکستانه د مهاجرو په راستنولو کې انعطاف وکړي . دا پروسه باید تدریجي ، با عزته او د دغو سازمانو له اقتصادي همکاریو سره یوځای پرمخ بوتلل شي .
شاهین افغان