تاند:( یکشنبه، د میزان ۷مه) په کابل کې د ملګرو ملتونو ځانګړې استازې د خپلو یو شمېر همکارانو او په کابل کې د جاپان د سفیر اوکادا تاکاشي په ملتیا د هرات زلزله ځپلې ولسوالۍ زنده جان ته سفر کړی.
د جاپان سفارت په یوه اعلامیه کې ویلي، چې سفیر د یاد شوي سفر پر مهال د هرات د دغې ځپل شوې ولسوالۍ د بیارغونې له چارو د خپل هېواد ملاتړ اعلان کړی.
د جاپان سفیر په دې برخه کې د کومې مشخصې مرستې ژمنه نه ده کړې.
د ملګرو ملتونو ځانګړې استازې رزا اوتونبایوا هم د هرات خونړۍ زلزلې ویجاړوونکې ګڼلي او زلزله ځپلو سره یې پر مرستو ټینګار کړی.
مخکې جاپان د هرات زلزله ځپلو سره د څلور نیم میلیونه ډالره مرستې اعلان کړی و.
د ملګرو ملتونو د شمېرو له مخې، د هرات په زنده جان کې د څو اوونۍ مخکې زلزلو څه باندې یو نیم سل زره کسان اغېزمن کړي او تر دوه زرو زیات کورونه یې ویجاړ کړي دي.