تاند:( دوشنبه، د میزان ۲۴مه) د طالبانو ځایي چارواکو په نورستان کې د یوه کوچني هوايي ډګر د جوړېدو خبر ورکړی دی.
د نورستان لپاره د طالبانو مرستیال والي مولوي فیصل مختار ویلي، چې د دغه ولایت په مرکز پارون کې د یوه کوچني هوايي ډګر د جوړېدو چارې د ۶ سوه زره افغانیو په لګښت پیل شوې.
د نوموړي په وینا، یاد هوايي ډګر په دوه نیم جریبه ځمکه کې جوړيږي، چې د جوړېدو چارې به یې د لسو ورځو په موده کې بشپړې شي او لګښت یې د ولایت مقام له لخوا ورکول کېږي.
سرچینه زیاتوي، دغه کوچنی هوايي ډګر به په یو وخت کې د درېیو چورلکو د کیناستو ظرفیت ولري.
نورستان د افغانستان له ډېرو محرومو ولایتونو څخه دی، خو د طالبانو له بیا واکمنیدو سره پکې د ځینو رغنیزو او پراختیایي پروژو خبرونه ورکول کیږي.