تاند:( دوشنبه، د میزان ۲۴مه) د طالبانو د اوبو او انرژۍ وزارت (د روانې تلې له ۲۴ څخه ۲۶ نېټې پورې) د هېواد د سیندیزو حوزو په ځینو ځایونو کې د اوبو کچې د لوړوالي او د سېلابونو د راوتلو اټکل کړی دی
دغه وزارت په یوه خبرپاڼه کې ویلي چې د هېواد د هوا پېژندنې ادارې او د نړیوالې هوا پیژندنې ارګانونو د وړاندوینو له مخې د هېواد په ځينو برخو کې د نسبتاً تېزو بارانونو له امله د سيلابونو راوتلو اټکل کړی چې د دغه ناڅاپي اورښتونو او سېلابونو راوتلو ډېر اټکل د (پنج آمو، کابل او هلمند) سينديزه حوزه کې شوی دی.
په ذکر شویو نېټو کې د سېلابونو د راوتلو احتمال د بارانونو او واورې د ویلې کېدلو او د اوبو د کچې لوړوالی په ځانګړې توګه د (کوکچه، بغلان، پنجشیر، غوربند، لوگر، میدان، جلال آباد، کنړ، لغمان، خوست پکتیا او غزنی) سیندونو پر لاره او د ذکر شوو ځایونو په ځینې سیلبرونو کې موجود دی..
د وزارت په اعلامیه کې راغلي:« له ټولو هغو هېوادوالو څخه چې د نوموړو سیندونو پر غاړو کې استوګن دي، هیله کېږي، چې د سیلاب د راوتلو په ترڅ کې د سیند د غاړو اړوند او هغه خلک چې په لاندینیو سیمو کې ژوند کوي خبر کړي؛ تر څو د ځان او خپلو ماشومانو د ساتنې لپاره د سیندونو په غاړو کې له هر ډول تګ او راتګ څخه ډډه وکړي او د انساني او مالي زیانونو څخه مخنیوی وشي»
دا په داسې حال کې ده، چې په وروستیو کې د بارانونو له امله په یو شمېر ولایتونو کې سېلابونه راوتي او یو شمېر خلکو ته یې مرګ ژوبله او مالي زیانونه اړولي.
زیانمن شوي خلک د مرستو له نه رسیدو شکایت کوي او وایي چې طالبان باید یوازې په خبرتیاوو بسنه ونه کړي؛ بلکې د دوی د مرستې لپاره لاس په کار شي.