تاند:(پنجشنبه، د میزان ۲۰مه) د طالبانو د رژیم ویاند ذبیح الله مجاهد د روسیې د یوه مقام هغه څرګندونې رد کړې، چې ګواکې امریکا او برېتانیا په افغانستان کې د پوځي اډو د لرلو په اړه د ارزونو په حال کې دي.
د روسيې د فدرال امنیتي ادراې رییس، لکساندر بورتنیکوف ویلي: «د امریکا او بریټانیا اطلاعاتي خدمتونه د افغانستان په شاوخوا کې د بې ثباتۍ د رامنځته کېدو په برخه کې اصلي رول لري. د امریکا او بریټانیا د اطلاعاتو سازمانونه د افغانستان په څو مهمو ولایتونو کې د اطلاعاتي حضور د بیا ژوندي په لټه کې دي.»
د طالبانو ویاند ذبیح الله مجاهد بیا دا څرګندونې ردوي او وایي، چې دوی به هېڅ هېواد ته په افغانستان کې د استخباراتي فعالیت اجازه ورنکړي.
مجاهد زیاتوي، د نړۍ هېوادونو ته نه ښايي چې، د افغانستان خاوره د سیالیو پر ډګر بدله کړي.
څه موده مخکې د روسیې د بهرنیو چارو وزیر سرګي لارووف د افغانستان په اړه د مسکو فارمټ پنځمې غونډې ته په استولي پيغام کې ویلي وو، چې روسیه به په هېڅ توجیه په افغانستان کې د امریکا او ناټو حضور بیا ونه زغمي.
ځینې شنونکي باور لري، چې د طالبانو له بیا واکمنیدو سره دوی د سیمې او نړۍ د قدرتونو ترمنځ سیالۍ کې د افغانستان د خوندي ساتلو وړتیا نه لري او وېره شته، چې د واکمن رژیم د نه مشروعیت، انحصار او خلکو او نړۍ سره د پراخ واټن له امله افغانستان د نیابتي سیالیو په میدان بدل شي.
طالب چارواکي بیا داسې وړاندوینې ردوي او د بې طرفه، متوازن او ملي ګټو پر اساس د بهرني سیاست او ملي حاکمیت ساتلو ادعاوې کوي.