تاند:(پنجشنبه، د میزان ۲۰مه) د طالبانو د معادن او پټرولیم وزیر شهاب الدین دلاور نن په کابل کې د قطر له درېیو شرکتونو سره د ۲۲۰ میلیونه ډالرو په ارزښت یو تړون لاسلیک کړی.
نوموړي ویلي، چې د دغه تړون له مخې یاد شوي شرکتونه د جبل السراج د سمنټو په فابریکه کې پانګونه کوي.
ویل شوي، د دغې پانګونې له مخې هر کال یو میلیون او ۵۰۰ زره ټنه معیاري سمنټ تولیدیږي.
د طالب وزیر په وینا، یاد شوی تړون به ۵ زرو تنو ته په مستقیم او زرګونو نورو ته په نا مستقیم ډول د کار زمینه برابره کړي.
د یاد شوي تړون موده ۳۰ کاله ښودل شوې ده.
د جبل السراح د سمنټو فابریکه په ۱۳۳۷ لمریز کال کې تاسیس شوې، چې هغه مهال یې په یوه ورځ او شپه کې د سل ټنو سمنټو د تولید ظرفیت درلود.
دا فابریکه د جهادي تنظیمونو د جګړو پر مهال له کاره ولویده، خو په ۱۳۹۵ کال کې بیا فعاله او د پخواني تولید ظرفیت یې پیدا کړ.
د طالبانو رژیم د ورته پروژو د پراختیا له امله ستایل کیږي، خو ځینې منتقدان یې قرادادونه غیر قانوني او غیر تخصصي بولي.
د دوی په وینا، طالبان د داسې قراردادونو مشروعیت او مسلکي متخصصین دواړه نه لري، خو طالبان دا ادعاوې بې اساسه بولي.