تاند (دوشنبه، د میزان ۱۷ مه) د افغانستان د کرکټ نامتو لوبغاړي محمدنبي د هرات ولایت له زلزله ځپلو سره د بیړنیو مرستو غوښتنه وکړه.
نبي دا غوښتنه وروسته له دې وکړه چې راشدخان وویل، په روان نړیوال جام کې خپل فیس یا هغه پیسې چې ده ته ورکول کېږي، د هرات زلزله ځپلو ته ځانګړي کوي. او په متحده عربي اماراتو کې مېشت افغان سوداګر میرویس عزیزي ویلي چې ۲۰۰ میلیون افغانۍ مرسته کوي.
د افغانستان کرکټ بورد هم ویلي چې له زلزله ځپلو سره ۲ میلیون افغانۍ مرسته کوي.
کام اییر هوايی شرکت د ۱۰ میلیون افغانیو مرسته اعلان کړې ده.
د افغانستان د پخواني ولسمشر نجیب الله لور موسکا نجیب له افغانانو غوښتي چې خپل منځي اختلاف هېر کړي او په ګډه د هرات له زلزله ځپلو سره عملي مرسته وکړي.
د افغانستان پخواني ولسمشر اشرف غني د هرات د زلزلې په اړه په خپل پیغام کې له زلزله ځپلو کورنیو سره د غمشریکۍ ترڅنګ له هغوی سره د مرستې راټولولو او ورته په شفاف ډول د رسولو لپاره د ملي پیوستون غږ کړی دی: «طبیعي پېښې د ملي پیوستون او یووالي لپاره یو ملي ازموینه وي. په همدې اساس باید له عواقبو سره یې په چټکۍ او شفافیت ژر تر ژره اقدام وشي، د شهیدانو، ټپیانو او زیانونو کچې معلومولو لپاره باید ټول لاس په کار شوو.»