تاند (یکشنبه، د میزان ۱۶مه) په هرات کې د مرګونې زلزلې له کبله د نړۍ یو شمېر هیوادونو او موسسو له افغانانو سره خواخوږي څرګنده کړې ده.
متحده عربي اماراتو ویلي چې له افغانانو سره پیوستون او د زلزلې له قربانیانو سره خواخوږي څرګندوي.
د دغه هیواد د بهرنیو چارو وزارت نن په یوه بیان کې ویلي، په هرات کې د زلزلې له امله د زرګونو کسانو پر مړینه او ژوبلېدو ژوره خواشیني ښيي او د زړه له کومي خواخوږي څرګندوي.
ایران ویلي زلزله ځپلیو سیمو ته یې ژغورونکي ټیمونه لیږلي دي.
د ایران د سره میاشت ټولنې نن په یوه بیان کې ویلي چې په لسو ټیمونو کې یې پنځوس تنه ژغورونکي له رضوي خراسان او جنوبي خراسان ولایتونو څخه، چې د افغانستان د هرات ولایت ګاونډي دي، افغانستان ته استولي دي.
دې ټولنې همداراز ویلي چې ۵۰۰ خیمې، زر فرشونه، ۴ زره کمپلې او یو شمېر نور وسایل یې له خپلو ژغورونکو سره یوځای د هرات ولایت زلزله ځپلیو ته لېږلي دي.
د چین د بهرنیو چارو وزارت بیا ویلي تر وسه وسه به هڅه وکړي چې اړتیا ته په پام د افغانستان له زلزله ځپلیو سره مرسته وکړي.
د چین د باندنیو چارو وزارت ویندوی د هرات ولایت د زلزلې د سر و مال زیاتو زیانونو ته په اشارې ویلي چې چین د انسانانو پر مړینه خواشینی دی او د هغوی د کورنیو له پاتې غړیو سره ژوره خواخوږي کوي.
د چین د بهرنیو چارو وزارت ویاند همداراز ویلي، باور لري چې افغانان به د زلزلې پر ناوړو عوافبو برلاسه شي اوخپل کورونه به بېرته جوړ کړي.
په افغانستان کې د جاپان سفیر تاکاشي اوکادا، په یوه پیغام کې ویلي، چې جاپان وضعیت څاري او تل له افغانانو سره دی.
د کاناډا د بهرنیو چارو وزیرې، ملاني جولي اعلان کړی، چې هیواد یې د افغانستان د خلکو د ملاتړ لپاره چمتو دی.
د جرمني د بهرنیو چارو وزارت اعلان کړی، چې په افغانستان کې د زلزله ځپلو سره د مرستې لپاره، له خپلو نړیوالو شریکانو سره په همغږۍ کې دي.
د ملګروملتو سرمنشي انتونیو ګوتریش په هرات کې د زلزلې له امله پر مرګ ژوبلو خواشیني څرګنده کړې او له نړیوالې ټولنې یې غوښتي چې له زیانمنو شویو خلکو سره مرستې ته راودانګي.
د ملګروملتو له لوري په یوه بیان کې د سرمنشي ښاغلي ګوتریش له قوله ویل شوي چې په افغانستان کې د دوی شریکان د اړتیاوو د ژر تر ژره ارزونې او د بیړنیو مرستو د برابرولو لپاره، د طالبانو له حکومتي چارواکو سره د همغږۍ په حال کې دي.
د امریکا د نړیوالې پراختیا ادارې (USAID) مشرې، سامنتا پاور ویلي چې د دوی شریکان په اغیزمنو سیمو کې ځای پرځای شوي ترڅو د روغتیایی خدمتونو او د بیړنیو تجهیزاتو د چمتو کولو په ګډون له زیانمن شویو سره مرسته وکړي.
اروپايي ټولنې ویلي چې ۱۰۰ ټنه درمل به دد هرات د زلزلې ټپیانوته واستوي.
نړۍ ته افغانان انسانان نه ښکاري او نه یې قصه کې دي. د ټولې غربي نړۍ میډیا د اسرایلو خبرونه نشروي او خواخوږي ېې ده تر اوسه هیڅ غربي میډیا د افغانستان د زلزله ځپلو چې په زرونو دي حتی خبر ندی خپور کړی مګر د یو څو اسرایلو د مرګ خبرونو د ټولې نړۍ میډیا نیولې. په غربیانو پورې باید زړه ونه تړل شي او افغانان چې هر چیرته وي باید مرسته وکړي.