تاند (جمعه، د میزان ۷ مه) د روسیې د بهرنیو چارو وزیر سرګي لاروف خبرداری ورکوي، چې افغانستان ته د امریکا او ناټو بیرته ستنیدل که په هره توجیه وي، دوی او د سیمې نورو هېوادونو ته د زغم وړ نه دی.
نوموړي دا څرګندونې په هغه لیکلي پيغام کې کړي، چې د افغانستان لپاره یې د هېواد د ځانګړي استازي ضمیر کابلوف له لوري نن د افغانستان په اړه د مسکو فارمټ په پنځمه غونډه کې ولوستل شو.
لاروف په دغه پیغام کې امریکا او ناټو تورن کړي، چې په افغانستان کې د شل کلن حضور پر مهال یې افغانانو ته درانه زیانونه اړولي.
د ده په وینا، امریکا او ناټو باید اوس د وضعیت د لا ترینګلي کولو پر ځای د کړو ویجاړیو د رغونې لپاره مرسته وکړي.
د روسیې اسپوتنیک خبري اژانس لیکلي، چې روسیه په افغانستان کې له سیمې د لرې هېوادونو له هڅو اندېښمن دی، خو په دې اړه یې نور جزییات نه دي وړاندې کړي.
د افغانستان په اړه د مسکو فارمټ پنځمه غونډه نن د روسیې په تاتارستان جمهوریت کې پیل شوه.
په دې اړه دا خبرونه هم لوستلی شئ:
کابلوف: طالبان د مسکو فارمټ برخوال نه، بلکې مېلمانه دي – تاند (taand.net)