تاند(شنبه، د میزان ۱ مه) د طالبانو د حکومت د ريیس الوزرا مرستیال عبدالسلام حنفي د افغانستان لپاره د چین له سفیرجاو شینګ سره په کتنه کې وویل چې د دوی حکومت لېواله دی چې د چین په «یوه کمربند یوه لاره» پروژه کې شریک شي.
حنفي په دې کتنه کې دې ته په اشارې چې د افغانستان او چین اړیکې په ټول تاریخ کې تل ښې وې، د کابل- پیکینګ ترمنځ د اړیکو د لا پیاوړتیا غوښتنه وکړه، ویې ویل«د اسلامي امارت پالیسي له ګاونډیانو په تېره بیا چین سره د دوه اړخیزو اړیکو دوام، د یو بل په چارو کې نه لاسوهنه او دوه اړخیز درناوی دی.»
ده دا هم وویل چې افغانستان هڅه کوي د بیلابیلو دهلیزونو له لارې د چین له یوه لار یو کمربند پروژې سره وصل شي.
د چین سفیر، چې تازه ګومارل شوی، او لومړنی سفیر دی چې د طالبانو حکومت ته یې باورلیک سپارلی دی، د طالبانو د ريیس الوزرا مرستیال ته وویل چې هیواد یې په افغانستان کې د دایمي سولې او ثبات ننګه کوي او هڅه کوي چې افغانستان په سترو اقتصادي پروژو کې شامل کړي.