تاند (یکشنبه، د سنبلې ۲۵مه) د طالبانو د حکومت د اطلاعاتو او کلتور وزارت مرستیال مهاجر فراهي وايي چې دغه وزارت په تېرو دوو کلونو کې ۲۵ رسنيو ته د فعاليت جوازونه ورکړي دي.
باختر اژانس نن د مهاجر فراهي په قول ویلي چې حاضردمه په هېواد کې ٣٦٤ صوتي او تصویري رسنۍ فعاليت لري.
فراهي تایید کړه چې ګڼو نورو رسنیو، چې د عاید سرچینه یې په بهر کې وه، خپل فعالیت درولی خو «اسلامي امارت» کومه رسنۍ نه ده بنده کړې.
ده زیاته کړه:«هره هغه رسنۍ چې د اسلامي ارزښتونو، ملي ګټو او د خلکو له کلتور سره سم فعالیت کوي، د فعالیت اجازه ورکول کېږي او ملاتړ یې کوي.»
تر دې مخکې د رسنیو ملاتړو بنسټونو ویلي وو چې د طالبانو له واکمنۍ وروسته شاوخوا ۵۰ سلنه رسنۍ تړل شوي او تر ۶۰ سلنه ډېرو خبریالانو او د رسنیو کارکوونکو خپلې دندې له لاسه ورکړي دي.
د خبریالانو د خوندیتوب نړیوالې کمېټې دوې اوونۍ مخکې په خپل راپور کې ویلي و چې طالبانو د ۲۰۲۱ کال له اګست میاشتې راهیسې په افغانستان کې لږترلږه ۶۴ خبریالان د دوی د دندې له امله نیولي دي.
له بلې خوا د بې پولې خبریالانو نړیوال سازمان هم تېره میاشت په خپل راپور کې ویلي و چې په تېرو دوو کلونو کې د ۱۲۰۰۰ خبريالانو ۷۵ سلنه د خپلو دندو پرېښودو ته اړ شوي چې په سلو کې ۸۰ يې ښځينه خبريالانې دي.
په همدې حال کې اکثره رسنۍ د عاید د کمېدو له کبله له اقتصادي ستونزو شکایت لري، تر دې چې ځینې خبریالان وايي چې د رسنیو خاوندان منظم معاش نه ورکوي.
خو ښاغلی فراهي وايي، د اطلاعاتو او کلتور وزارت هڅه کوي چې د رسنیو د برېښنا پاتې پیسې او مالیات کم کړي.