تاند (چهارشنبه، د سنبلې ۲۲مه) د افغانستان لپاره د چین نوي سفیر نن (چهارشنبې) په کابل کې د طالبانو د حکومت ريیس الوزرا ته باورلیک وسپاره.

د رویټرز خبري اژانس د راپور له مخې، طالبان وايي، د ۲۰۲۱ له اګسته، چې دوی واک ترلاسه کړی، دا لومړنی سفیر دی چې د یوه هیواد له لوري په افغانستان کې ګومارل کېږي.

د رویټرز پر اساس، سره له دې چې تراوسه پورې هیڅ هیواد د طالبانو حکومت په رسمیت نه دی پېژندلی، څرګنده نه ده چې افغانستان ته د نوي سفیر لېږل د پیکینګ له خوا د طالبانو د حکومت د رسمیت پېژندلو لور ته ګام دی او که نه.

د چین د باندنیو چارو وزارت په دې اړه د رویټرز خبري اژانس پوښتنې ته ځواب نه دی ویلی.

د طالبانو د حکومت مرستیال ویاند بلال کریمي په یوه بیان کې ویلي:« د افغانستان اسلامي امارت رئیس الوزرا محترم الحاج ملامحمدحسن اخند نن له غرمې مخکې د افغانستان لپاره د چین د نوي سفیر ښاغلي جاو شینګ باورلیک د یو لړ تشریفاتي مراسمو په ترڅ کې ومانه.»

۸/۸ـــ محترم رئیس الوزرا د افغانستان او چین ترمنځ اړیکې مهمې وبللې اود اشغال له خاتمې وروسته په تېرو دو کلونو کې د افغانستان او چین ترمنځ مناسبات او همکارۍ یې په ښه کچه کې یادې کړې او د دوه اړخیزو اړیکو د لا پیاوړتیا لپاره یې د نورو ګامونو د پورته کېدو هیله هم څرګنده کړه.

— Bilal Karimi(بلال کـریمي) (@BilalKarimi44) September 13, 2023

د طالبانو د حکومت د باندنیو چارو وزارت ویندوی تایید کړه چې ژیاو شینګ د ۲۰۲۱ له اګسته راوروسته لومړنی سفیر دی چې په افغانستان کې د یوه هیواد له لوري ټاکل کېږي.

د چین مخکینی سفیر وانګ یو په ۲۰۱۹ م کال ټاکل شوی و او تېره میاشت یې ماموریت پای ته ورسید.

نورو هیوادونو لکه پاکستان او اروپايي اتحادیې د سفیرانو پر ځای کابل ته شارژدافېران استولي چې د سفیر دنده اجرا کوي خو رسماً د سفیرانو رول نه لري.

ایران هم په کابل کې خپل سفیر د طالبانو د واک په موده کې تبدیل کړ او اوسني سفیر کاظمي قمي ته سرپرست سفیر او د ایران د ولسمشر ځانګړی استازی وايي.