تاند- سپېس ایکس په یو وار د امریکا د فضايي ځواک یو شمېر پرمختللې پوځي سپوږمکي د مځکې مدار ته ورسولې.
د سپېس ویبپاڼې د راپور له مخې، فالکن ۹ توغندي د امریکا د فضايي پراختیا ادارې ۱۳ سپوږمکۍ په کلیفورنیا کې د وندریرګ له فضايي مرکزه فضا ته ولېږلې.
د سپېس ایکس یوه انجینیر زاکاري لوپن په دې اړه وویل، دا په روان ۲۰۲۳ م کال کې د سپېس ایکس یو شپېتم ځل دی چې فضا ته سپوږمکۍ توغوي.
سپېس ایکس په لومړیو کې غوښتل چې دا ماموریت د اګست په ۳۱ مه اجرا کړي، د فالکن ۹ توغندي د لومړي بوسټر د یوه انجن د نیمګړتیا له کبله دا ماموریت د سپټمبر لومړۍ ته وخنډول شو خو د سپټمبر په دوهمه هم د توغندي تر لیږلو صرف ۱۲ دقیقې مخکې د تخنیکي ستونزې له امله ماموریت بیا وځنډول شو.
بالاخره د سپټمبر په درېیمه سپېس ایکس د امریکا د فضايي ادارې ۱۳ سپوږمکۍ د مځکې مدار ته ولیږلې.
سپېس ایکس د سږ کال په لومړیو کې د امریکا د فضايي ادارې ۱۰ سپوږمکۍ د فالکن ۹ توغندي په وسیله د مځکې مدار ته وړې وې.