تاند (جمعه، د سنبلې ۱۰مه) نیویارک ټایمز ورځپاڼه وايي چې له افغانستانه د امریکايي پوځیانو له وتلو دوه کاله وروسته د امریکا ولسمشر جو بایډن د دې غوښتنې منلو ته نه تیاریږي چې له طالبانو سره دې لا زیات تعامل وشي.
د ورځپاڼې پر اساس، د بایډن په اجنډا کې له طالبانو سره زیات تعامل، د هغو د حکومت رسمیت پېژندل او د بندیزونو لېرې کول شامل نه دي.
د نیویارک ټایمز ورځپاڼې په راپور کې وړاندې راغلي چې سپینې ماڼۍ د طالبانو د حکومت د رسمیت پېژندلو او د افغانستان د شتمنیو د ازادولو احتمال رد کړی دی.
خو دا په داسې حال کې ده چې ځینو کتونکو او مرستندویانو له جو بایډن څخه غوښتي چې په افغانستان کې د بیوزلۍ او لوږې د کمېدو لپاره له طالبانو سره په مستقیمو مرستو خپل دریخ نرم کړي.
نیویارک ټایمز د ښځو او نجونو خلاف د طالبانو پر افراطي دریځونو د انتقاد ترڅنګ لیکلي چې د طالبانو له لوري د کوکنارو د کښت مخنیوی، د کورنۍ جګړې پای ته رسول او د فساد له منځه وړل د هغو مهمو ټکو په توګه یاد کړي چې امریکايي چارواکي یې حیرانه کړي دي.
طالبانو په درې واړو برخو کې د پام وړ پرمختګ کړی خو که د ښځو خلاف یې افراطي اقدامات نه وای کړي، ممکن هیڅ هیواد د دوی د حکومت له رسمیت پېژندلو ډډه نه وای کړې.
د امریکا د بهرنیو چارو وزارت هم د طالبانو د حکومت له لوري د کوکنارو د کښت د مخنیوي او ترویستي ضد اقدامات هیله بخښونکي بللي و.
د بحران د نړیوالې ډلې شنونکی ګریم سمیت، چې په افغانستان کې اوسیدلی دی، وايي:«ډیر کارونه چې باید وکړو د طالبانو همکارۍ ته اړتیا لري.»
ده په فارن افیرز خپرونه کې په یوه لیکنه کې له لوېدیځو موسسو او حکومتونو غوښتي چې له طالبانو سره اغېزمنې اړیکې ټینګې کړي.