تاند: (جمعه، د وږي ۱۰ مه ) په بدخشان کې د طالبانو چارواکو د یوې ترافیکي پېښې پر مهال د دوی د یوه قومندان په ګډون د ۶ تنو د مړینې او ۲ نورو د ټپي کیدو خبر ورکړی.
د بدخشان د امنیه قومندانۍ د اعلامیې له مخې، یاده پېښه په یاوان ولسوالۍ کې پرون پنجشنبه هغه مهال وشوه چې د دوران خیورس په نوم دغه قومندان د کورنۍ له غړو سره د خپل زوی واده ته روان و چې هایلکس موټر یې چپه شو.
دوران خیورس په راغ کې د طالبانو د یوه کنډک قومندان و.
نور وژل شوي څلور نارینه او یوه ښځه ښودل شوې ده.
د طالبانو له بیا واکمنیدو سره څو ځله د دوی یو شمېر چارواکي او منسوبین په ورته پېښو کې مړه شوي دي.
په افغانستان کې د ښادۍ او سیاحت پر مهال د ترافیکي پېښو له امله مرګ ژوبله یوه عامه ستونزه ده، چې ډېر ځله ملکي وګړي هم پکې قرباني کیږي.