تاند (جمعه، د سنبلې ۱۰ مه) په نورستان کې خلک او ځايی چارواکي وايي چې د دغه ولایت په ځنکلونو کې د وروستیو ورځو لګېدلي اور لږترلږه ۶۰ هکتاره ځنګلونه په ایرو بدل کړي دي.
په نورستان کې د چاپېریال ساتنې ادارې ريیس سرتاج الدین ساپي پرون (پنجشنبې) رسنیو ته وویل چې دې اور ډیر تاوان اړولی خو بالاخره د سیمې د ۷۰۰ اوسیدونکو د اشر په نتیجه کې مړ شو.
ده ونه ویل چې اور کله بل شوي و او کله مړ شو.
خو د سیمې دوو اوسیدونکو تاند ته وویل چې اور د روانې اوونۍ د یکشنبې په ورځ د برګمټال په ځنکلونو کې بل شو او ډیر ژر خپور شو.
د سرتاج الدین په وینا د دې اور په نتیجه کې د نورستان د برګمټال ولسوالۍ د ښکلي طبیعت ۶۰ هکتاره ځنګلونه سوځېدلي دي.
تراوسه پورې د اور لګېدو د علت په اړه څوک نه پوهیږي خو تر دې وړاندې ځینو کسانو په دې سیمه او د نورستان او کونړ په نورو ځنګلونو کې د اور لګېدو تور پر پاکستان لګولی و او استدلال یې دا و چې پاکستان فکر کوي چې د ټي ټي پي جنګیالي په دغو ځنکلونو کې پناهځایونه لري.