تاند (دوشنبه، د تلې/ میزان ۱۲ مه) ټاکل شوې ده چې نن (دوشنبې) د افغانستان په اړه د مسکو فارمت د مشورتي ناستو اتمه غونډه د امیرخان متقي په ګډون په مسکو کې جوړه شي.
د روسیې د باندنیو چارو وزارت مخکې لا ویلي و چې د افغانستان د پلاوي مشري به د بهرنیو چارو وزیر امیرخان متقي کوي.
د روسیې د بهرنیو چارو وزارت ویاندې ماریا زاخارووا ویلي، د هند، ایران، قزاقستان، چین، قرغیزستان، پاکستان، روسیې، تاجکستان او ازبکستان ځانګړي استازي او جګپوړي چارواکي به په دې غونډه کې ګډون وکړي.
د بیلاروس او مصر پلاوي به هم د مېلمنو په توګه په غونډه کې برخه واخلي.
د روسیې د بهرنیو چارو وزارت ویلي، غونډه به د دغه هېواد د بهرنیو چارو وزیر سرګي لاوروف په وینا پیل شي. ټاکل شوې چې امیرخان متقي د غونډې په څنډه کې له لاوروف سره هم وګوري او د دواړو هېوادونو د دوه اړخیزو همکاریو په اړه خبرې وکړي.
د روسیې په وینا، د مسکو فارمت غونډه به له افغانستان سره د سیمې د هېوادونو پر سیاسي او اقتصادي تعامل، د سیمهییزې همکارۍ پر پیاوړتیا او د ترهګرۍ او نشهيي توکو د قاچاق پر وړاندې د ګډې مبارزې پر موضوعاتو تمرکز وکړي.
روسي چارواکو ویلي چې په دې ناسته کې به د افغانستان او پاکستان په اړیکو کې پر روان کړکېچ هم تمرکز وشي. په کابل کې د روسیې سفارت د افغانستان پر خاوره د پاکستان پر بمباریو، چې ملکیانو ته پکې مرګ ژوبله اوښتې، اندېښنه ښوولې وه.
روسیه تر اوسه یوازینی هېواد دی چې د طالبانو حکومت یې په رسمیت پېژندلی او په نړیوالو ناستو کې یې له طالبانو سره د تعامل او د اړیکو د پراختیا ملاتړ څرګند کړی دی.