تاند: ( یکشنبه، د زمري ۱۵ مه ) د امریکا متحده ایالاتو د جیولوژۍ ادارې، په افغانستان کې د تېرې شپې د زلزلې جزییات خپاره کړل.
دغې ادارې ویلي، تېره شپه د کابل په ګډون د افغانستان ځینې ولایتونه زلزلې ولړزول.
دا زلزله چې د شپې په ۸ بجې او ۳۰ دقیقې وشوه، د تلفاتو په اړه یې تر اوسه راپورونه نه دي ورکړل شوي.
د امریکا د جیولوژۍ سروې ادارې په یوه اعلامیه کې ویلي، چې د تېرې شپې زلزله د رښتر په اندازه ۵.۸ درجې او مرکز یې هم د هندوکش د غرونو لړۍ وه.
د یادې ادارې په وینا دا زلزله د افغانستان ترڅنګ په پاکستان، هند، تاجکستان او ازبکستان کې هم احساس شوې ده.
د طالبانو چارواکو تر اوسه په دې اړه څه نه دي ویلي.
په وروستیو کې افغانستان له ورځ تربلې زیاتېدونکو طبیعي پېښو سره مخ دی، چې له دې امله یې په اړه اندېښنې هم څرګندې شوې دي.