تاند: ( چار شنبه، د زمري ۱۱ مه ) د طالبانو د صنعت او سوداګرۍ وزارت سرپرست نورالدین عزیزي په مشرۍ، د دوی پلاوی او د خصوصي سکتور استازي پرون د قزاق _ افغان په سوداګريز نندارتون کې د ګډون په موخه قزاقستان هېواد ته روان شول.
د طالبانو د اعلامیې له مخې، د دې سفر موخه د قزاق- افغان سوداګریز نندارتون پرانیسته، د دواړو هېوادنو د خصوصي سکتور د استازو لیدنې او د دواړو هېوادونو تر منځ د سوداګرۍ، ټرانزیټ، صنعت او د پانګونې د جذبولو په اړه رسمي خبرې اترې دي.
ټاکل شوې په قزاق- افغان نندارتون او نورو پروګرامونو کې د هېواد له داخل او بهر څخه ۳۵۰ افغاني شرکتونه ګډون وکړي او د ۳ ورځو لپاره خپل صنعتي، کرنیز او معدني توکي نندارې ته وړاندې کړي.
په دې سربېره په پام کې ده، چې د دواړو هېوادونو د خصوصي سکتورونو تر منځ په ۱۶ سکتورونو کې د تړونونو د لاسلیک مراسم د ياد هېواد په پلازمېنه آستانه کې د یوې ورځې لپاره ترسره شي.
له دې سره خوا کې، د قزاقستان د بهرنیو چارو وزارت مرستیال د افغانستان بشري ناورین د افراطیت د پياوړتیا او له دې کبله د سیمې ثبات ته ننګونکی بللی.
په وروستیو کې د ملګرو ملتونو بېلابېلو بنسټونو په افغانستان کې د اقتصادي ناورین د شدت او په عین حال کې د نړیوالو بشري مرستو د کميدو خبر ورکړی.