تاند: ( سې شنبه، د سرطان ۲۷ مه) د مهاجرت نړیوال سازمان په یوه راپور کې ویلي، چې له ۲۰۱۴ کال راهیسې ۵۰۰ افغان کډوال اروپايي هېوادونو ته د تګ پر مهال مړه شوي دي.
دا په داسې حال کې ده چې د طالبانو له بیا واکمنیدو سره، د افغانانو ناقانونه مهاجرت تر پخوا لا زیات شوی.
راپور زیاتوي چې لا هم ډېری افغانان د اقتصادي ستونزو یا امنیتي ګواښونو له امله دغه خطرناک سفرونه کوي.
ویل کیږي چې د دې خطرناک سفر لګښت له 5,000 ډالرو څخه پیل کیږي او د 15,000 ډالرو یا ډیرو ډالرو ته رسیږي.
د راپورونو په اساس، یوه د پام وړ برخه افغان ځوانان انساني قاچاقبرانو ته په دې هیله چې اروپا ته به یې ورسوي، زرګونه ډالره ورکوي.
اروپايي ټولنې ویلي، د دې اتحادیې غړو هېوادونو ته د پناه غوښتنې قضیې تر ۴۰ سلنې زیاتې شوي، چې یوه لویه برخه خلک پکې افغانان دي.
طالبان، بیا د افغانستان وضعیت او اقتصاد ښه شوی بولي او لویدیځ تورنوي، چې په ناسمو تبلیغاتو ځوانان هېواد پریښودو ته هڅوي.