تاند: ( چار شنبه، د سرطان ۲۸ مه)  ټاکل شوې، چې د افغانستان لپاره د پاکستان د بهرنیو چارو د وزارت ځانګړی استازی اصف علي درانی نن کابل ته سفر وکړي.

پر دغې دندې، د هغه له ټاکل کیدو وروسته دا لومړی ځل دی، چې کابل ته سفر لري.

دا سفر په داسې وخت کې ترسره کیږي، چې په کابل کې د طالبانو حاکم رژیم په پرله پسې ډول د پاکستان تورونو سره مخ دی.

پاکستان ادعا کوي، چې د طالبانو تر کنټرول لاندې افغانستان کې د پاکستان د تحریک طالبان ډله یا (TTP) خوندي پټنځایونه او عصري وسلو ته لاسرسی لري.

پاکستاني چارواکي دا هم وایي، چې یاد شوی تحریک،له افغانستانه په پاکستان کې بریدونه تنظیموي.

 طالبانو بیا دا تورونه، په پرله پسې ډول رد کړي او بې اساسه ګڼلي دي.

د طالبانو د رژیم ویاند ذبیح الله مجاهد ویلي، چې د پاکستاني استازي د سفر پر مهال به یاد شوي تورونه بحث او خبرې ورباندې وشي.