تاند (جمعه، د تلې/ میزان ۱۰ مه) د قزاقستان او ازبکستان د ترانسپورټ وزارتونو او د متحده عربي اماراتو د انرژۍ او زېربنا وزارت د قزاقستان–ازبکستان–افغانستان–پاکستان د اورګاډي پروژې یا «منځنۍ اسیا–سوېلي اسیا» (CASA) په اړه د همکاریو یو تفاهملیک لاسلیک کړی دی.
د قزاقستان د حکومت د رسنیو دفتر ویلي، چې د دې پروژې له لارې به منځنۍ او سوېلي اسیا د اورګاډي نوې شبکې په وسیله سره ونښلول شي او د پاکستان سمندري بندرونو ته به د سیمې د هېوادونو لاسرسی اسانه شي.
د تفاهملیک له مخې، درې واړه هېوادونه به د پروژې تخنیکي او اقتصادي مطالعات او تحلیلي ارزونې ترسره کړي او د اړینو اورګاډي زېربناوو او اړوندو تاسیساتو د جوړولو امکان به وڅېړي. همداراز د پروژې د تخنیکي، اقتصادي او مالي اړخونو د ارزونې لپاره به یوه ګډه کاري ډله جوړه شي.
د قزاقستان حکومت ویلي، قزاقستان او ازبکستان پراخه اورګاډي زېربناوې او د ترانزیټ لوړ ظرفیت لري، په داسې حال کې چې متحده عربي امارات د ترانسپورټي زېربناوو، لوژستیک او سترو پانګیزو پروژو د پلي کولو نړیواله تجربه لري.
د منځنۍ اسیا–سوېلي اسیا د ترانسافغان ترانسپورټي دهلېز له لارې هر کال د پاکستان کراچۍ او ګوادر بندرونو ته د ۱۰ میلیونه ټنو پورې د مالونو د لېږد ظرفیت اټکل شوی دی.
قزاقستان تر دې مخکې ویلي وو چې چمتو دی له ازبکستان او ترکمنستان سره یوځای د افغانستان له لارې د مزارشریف او تورغونډۍ په مسیر کې د اورګاډي پټلۍ د جوړولو په پروژه کې همکاري وکړي.