تاند: ( سې شنبه، د سرطان ۲۷ مه) د امریکا د ملي امنیت شورا ویاند جان کربي ویلي: “تر اوسه پورې په پاکستان او یا هم د دغه هېواد په سرحدي سیمو کې په ترهګریزو کړنو او عملیاتو کې د افغان کډوالو د ونډې په اړه شواهد نه دي ترلاسه شوي.”
نوموړي دا هم ویلي: “موږ داسې نښې نه دي لیدلي چې افغان کډوال دې په پاکستان کې دننه او یا دې په سرحدي سیمو کې ترهګریز عمل ترسره کړي.”
هغه د پاکستان له خوا افغان مهاجرینو او مهاجرینو ته د پټنځایونو د برابرولو له امله مننه وکړه او ویې ویل: دغه افغانان د یوه خوندي او امن ځای په لټه کې دي.
امریکایي ویاند زیاته کړه: موږ به په دغه هیواد کې د تروریستي ګواښونو په اړه له پاکستان سره خپلو همکاریو ته دوام ورکړو.
په کابل کې د طالبانو رژیم هم په پرله پسې ډول، د پاکستان د نا امنیو تر شا له افغان خاورې لاس لرل رد کړي، خو پاکستان چارواکي له دې سره بیا هم په دې اړه خپلو ادعاوو ته دوام ورکړی.
تمه کیږي، چې سبا د افغانستان لپاره د پاکستان ځانګړی استازی اصف علي درانی کابل ته لاړ شي او د وروستیو لفظي ناندریو په اړه د کابل د رژیم طالب چارواکو سره وغږیږي.