تاند: (یکشنبه، د سرطان ۱۸ مه) د کندهار د تېلو په عمومي پلورنځي کې د اورو پېښې ملیونونه افغانۍ تاوان اړولی.
ځایي طالب چارواکو ویلي، چې دغه اور پرون ناوخته لګیدلی، چې وروسته د اطفایې په مرسته مهار شوی.
د طالبانو د امنیې قومندانۍ د معلوماتو له مخې، په دې پېښه کې ځینې کسان برسېرن ټپیان شوي او اته ملیونه افغانۍ مالي زیان اوښتی دی.
په کندهار کې د طالبانو د نورم او سټندرډ ادارې رئیس محب اله عزام د اورلګېدو علت د برېښنا شارټي ښودلې ده.
د یوه بل خبر له مخې: د کندهار د شاه وليکوټ ولسوالۍ په حسنزو سیمه کې د یوه سپين ږيري جسد چې نیم ژویو خوړلی موندل شوی دی.
د دې سپین ږیري د مړینې لامل، هويت او خپلوان يې نه دي معلوم او دا مهال یې جسد د شاه وليکوټ ولسوالۍ په روغتيايي کلينيک کې پروت دی.
د کندهار لپاره د طالبانو امنیتي چارواکو تر اوسه په دې اړه څه نه دي ویلي.
ځینو رسنیو د دغه سپین ږیري د مړینې دلیل ځان وژنه او د ځان وژونې دلیل یې اقتصادي ستونزې ښودلي دي.
په وروستیو کې له کندهار څخه د ځان وژنې خبرونه هم زیات شوي.